Hallinn meiri en leyfilegt er

Hallinn á rekstri Ríkisendurskoðunar í fyrra var meiri en leyfilegt er samkvæmt reglum fjármálaráðuneytisins. Sagt var frá því í fréttum Stöðvar 2 í gær að Ríkisendurskoðun fór 43 milljónir króna fram úr fjárlögum í fyrra, á sama tíma og embættið gagnrýndi aðrar ríkisstofnanir fyrir agaleysi í fjármálum. Ríkisendurskoðandi benti á að hann hafi átt 27 milljónir til góða frá árinu á undan. Hallinn er samt sem áður 15 milljónir. 20% stofnana voru með halla í fyrra sem nemur meira en fjórum prósentum af fjárheimild ársins, en það eru þau viðmiðunarmörk sem settar eru í reglum frá fjármálaráðuneytinu. Ríkisendurskoðun sagði í skýrslu sinni að það sé til marks um mikið agaleysi að framkvæmd fjárlaga sé með þessum hætti ár eftir ár. Í nágrannalöndum okkar væru fjárlög virt og það heyrir til undantekninga að stofnanir fari fram úr heimildum. En í fyrra fór Ríkisendurskoðun sjálf fór yfir þessi mörk, með halla sem nemur tæpum fimm prósentum af fjárheimildum ársins. Í reglum fjármálaráðuneytisins segir að þegar svo fer muni ráðuneytið fara yfir skýringar forstöðumannsins, enda beri hann ábyrgð samkvæmt lögum. Komi í ljós að forstöðumaður hafi gerst brotlegur við starfsskyldur sínar er hægt að veita honum lausn frá störfum um stundarsakir, eða veita honum áminningu. Þegar ríkisendurskoðandi gagnrýndi aðrar stofnanir fyrir að fara fram úr, benti hann einmitt á þessa reglu. Sigurður Þórðarson, ríkisendurskoðandi sagði að ekki væri alltaf hægt að stemma hlutina nákvæmlega af á einu ári. Strax hafi verið gripið til niðurskurðar til að mæta hallanum. Auk þess hafi þetta ekki verið viðvarandi halli ár eftir ár eins og hann hefði gagnrýnt aðrar stofnanir fyrir, heldur væri þetta í fyrsta skipti sem embættið fór yfir, síðan 1987.