Mörgum gistihúsum lokað

Mörgum gistihúsum á landsbyggðinni verður lokað á næstu árum, vegna strangari krafna um brunavarnir. Margir gististaðir á landinu fengu slæma einkunn hjá brunamálastofnun, í nýútkominni skýrslu hennar. Samtök ferðþjónustunnar hafa í framhaldi af því spurt hversvegna í ósköpunum þessir gististaðir fái yfirleitt starfsleyfi. Fréttastofan fékk þau svör frá Brunamálastofnun í morgun, að í flestum tilfellum væru þetta gistihús sem hefðu fengið starfsleyfi samkvæmt eldri reglugerðum. Í úttekt brunamálastofnunar hafi verið miðað við nýjustu reglurnar. Ef gististaðir fá slæma einkunn þýðir það að settar eru ýmsar takmarkanir á starfsemi þeirra, svo sem að leyfilegur fjöldi gesta er minnkaður. Gististaðirnir verði annaðhvort að hlíta því, eða gera ráðstafanir til úrbóta. Í sumum tilfellum eru viðgerðir svo dýrar að það hreinlega borgar sig ekki fyrir rekstraraðilana að leggja í þær, og má búast við að slíkir gististaðir hverfi af markaðinum, á næstu tveim til þremur árum.