Dornier fugvél hætti við lendingu

Viðbúnaður var á Vestmannaeyjaflugvelli í morgun þegar Dornier vél Íslandsflugs var að koma frá Reykjavík. Þetta kemur fram á vefsíðu Eyjafrétta. Þegar vélin var að koma inn til lendingar hætti flugmaðurinn skyndilega við og tók upp hjólin.  Vélin hringsólaði yfir eyjunum í nokkurn tíma og lenti síðan í þriðju tilraun. Ástæðan var sú að ljós í mælaborði vélarinnar gaf til kynna að nefhjólið væri ekki komið niður. Vélin lenti síðan rétt rúmlega átta í morgun og gekk lendingin vel. Í ljós kom að pera í mælaborðinu var sprungin. Vélin flaug yfir flugturninn, væntanlega í þeim tilgangi að starfsmenn þar gætu séð hvort dekkin væru komin niður eða ekki en farþegar héldu ró sinni allan tímann.  Fimmtán farþegar voru um borð.