Halli á ríkisendurskoðun

Ríkisendurskoðun fór rúmlega fjörutíu milljónir króna fram úr fjárlögum í fyrra, á sama tíma og embættið gagnrýndi aðrar ríkisstofnanir fyrir agaleysi í fjármálum. Ríkisendurskoðandi segir ekki hægt að stemma uppgjör nákvæmlega upp á krónu sem úthlutað er á fjárlögum. Skeytin hafa flogið milli fjármálaráðherra og Ríkisendurskoðanda undanfarið, sem telur að framkvæmd fjárlaga hafi einkennst af agaleysi ár eftir ár, og vill að nú verði stigið á bremsuna. En ef litið er á ársreikninga ríkisendurskoðunar kemur í ljós að hún fékk tæpar 270 milljónir á fjárlögum fyrir árið 2003, sem urðu að rúmlega 284 með fjáraukalögum. Reikningurinn fyrir árið hljóðaði hinsvegar upp á rúmlega 327 milljónir, eða tæplega 43 milljónir í mínus. Þar með bætist stofnunin í hóp þeirra fjölmörgu sem fóru fram úr heimildum í fyrra, og Ríksendurskoðandi hefur gagnrýnt mjög. Sigurður Þórðarson, ríkisendurskoðandi bendir á að hann hafi átt 27 milljónir til góða frá árinu á undan. Hallinn er samt sem áður 15 milljónir. Skýringarnar sem eru gefnar eru helst þær að breytingar á húsnæði embættisins hafi kostað meira en áætlað var, mörg stór verkefni hafi verið unnin á árinu og því hafi þurft að kaupa sérfræðiþjónustu erlendis frá. Þetta sé í fyrsta skipti frá árinu 1987 sem embættið hafi farið fram úr fjárlögum. Sigurður segir að í skýrslum ríkisendurskoðanda sé ekki verið að gagnrýna að farið sé fram úr fjárheimildum heldur verði, þegar það gerist, að grípa til ráðstafana strax eins og ríkisendurskoðun hafi gert þegar í janúar. Gagnrýnin felist í því að viðvarandi sé, ár eftir ár, að halli sé hjá sömu stofnunum.