Vill láta athuga rekstrarleyfi

Framkvæmdastjóri Samtaka ferðaþjónustunnar botnar ekkert í því að gististöðum með óviðunandi brunavarnir sé veitt rekstrarleyfi og vill láta rannsaka hvernig standi á því. Brunavarnir eru í slæmu ástandi á hartnær helmingi gististaða í landinu. Erna Haukdsdóttir, framkvæmdastjóri Samtaka ferðaþjónustunnar segir það óþolandi fyrir ferðaþjónustuna að ástand í brunavörnum sé slæmt eða óviðunandi á tilteknum hluta gististaða í landinu. Furðulegt sé að staðir með óviðunandi brunavarnir fái yfir höfuð leyfi til rekstrar. Hún segir Samtök ferðaþjónustunnar vinna mikið að öryggismálum í ferðaþjónustu og vilji því spyrja brunayfirvöld á hverjum stað hvers vegna gististaðir sem fái einkunnina óviðunandi í sambandi við brunavarnir, fái yfirleitt rekstrarleyfi.