Grafa upp Gásakaupstað

Einar merkustu rústir miðaldakaupstaðar hérlendis er að finna rétt fyrir utan Akureyri, þar sem fornleifafræðingar eru að grafa upp Gásakaupstað hinn forna. Það hefur vafalaust oft verið glatt á hjalla í Gásakaupstað á miðöldum, sem getið er í fornum sögnum. Þar fór fram mikil verslun og viðskipti, enda var þetta mikilvæg miðstöð verslunar og erlendar skipakomur tíðar. Þar hefur verið iðandi mannlíf á sumrin, þar sem saman komu farmenn og kaupmenn, bæði Íslendingar og erlendir farmenn. Um helgina minnti handverksfólk á staðinn og þær fornleifarannsóknir sem þar fara fram, með því að setja upp tjaldbúðir og voru að ýmisskonar störfum. Rannsóknir hafa sýnt að á þeim tíma voru hlaðnir voru upp veggir úr torfi og tjaldað yfir meðan kaupskapurinn var stundaður, en innan veggja hafa verið eldstæði og setbekkir. Kaupstaðarústirnar eru vel varðveittar og þar eru ennfremur kirkjurústir, sem verið er að rannsaka. Kenningin er sú að verslun á Gásum hafi lagst af vegna breytinga í árósnum, sem hömluðu skipakomum. Rannsóknirnar eru taldar geta varpað nýju ljósi á verslun við Norður Atlantshaf á miðöldum, og hafa þannig rannsóknargildi langt út fyrir landsteinana.