Landeigendum tilkynnt um eignarnám

Landeigendum á Héraði, sem Landsvirkjun hefur ekki náð samkomulagi við um lagningu háspennulínu, verður tilkynnt formlega í dag að beðið hafi verið um leyfi til að krefjast eignarnáms í jörðum þeirra. Vegna Kárahnjúkavirkjunar hefur Landsvirkjun fengið leyfi stjórnvalda til að leggja háspennulínu Austur á héraði, og liggur hún víða um eignarlönd manna. Landsvirkjun hefur náð samningum um lögnina við alla nema eigendur fimm jarða. Hinn tólfta þessa mánaðar sendi Landsvirkjun því Valgerði Sverrisdóttur iðnaðarráðherra erindi, þar sem farið var fram á leyfi til þess að krefjast eignarnáms á spildum í jörðunum fimm. Nokkrar þessara jarða eru í sameign, og skipta eigendurnir samtals nokkrum tugum. Pétur Sverrisson, lögfræðingur hjá iðnaðarráðuneytinu, sagði í samtali við fréttastofuna, að í dag færu út tilkynningar til jarðeigendanna um að óskað hafi verið eftir leyfi til þess að krefjast eignarnáms í jörðunum. Eigendurnir hafa þá þriggja vikna frest til þess að koma með sínar skýringar og athugasemdir. Þær verða teknar til skoðunar í ráðuneytinu. Ef ráðherra veitir eftir það leyfi til eignarnáms, sem verður að telja nokkuð víst, verður málinu vísað til matsnefndar eignarnámsbóta. Hún kveður svo upp úrskurð um bætur, sem er endanlegur.