Kvartað yfir vef Morgunblaðsins

Fasteignabankinn Habil.is hefur kvartað við Samkeppnisstofnun yfir fasteignavef Morgunblaðsins og krefst þess að rekstur hans verði aðgreindur frá rekstri blaðsins. Það færist í vöxt að fólk í fasteignaleit noti Internetið í stað fasteignablaðanna. Á Netinu fást meiri upplýsingar, fleiri myndir og jafnvel teikningar. Í Árborg þekkist það sem dæmi að gögn frá byggingafulltrúa eru aðgengileg inni á fasteignavef. Um þriðjungur fasteignasala er farinn að rukka fyrir skráningu inn á vef, frá 2000 til 10.000 krónum. Tveir stærstu fasteignavefirnir eru habil.is og fasteignavefur Morgunblaðsins. Guðmundur Johnsen, eigandi Habil.is, segir þann vef fjármagnaðan með auglýsingum og að ómögulegt sé að hafa aðrar tekjur vegna samkeppni við Moggann. Hann segir blaðið hafa þá línu að þeir sem auglýsi mánaðarlega á hálfri síðu fái ókeypis aðsetur á fasteignavef Morgunblaðsins. Þar af leiðandi þurfi Habil.is einnig að hafa frítt inn á sinn vef.  Habil.is sendi inn kvörtun vegna þessa til Samkeppnisstofnunar fyrir ári síðan. Guðmundir segir þeirra markmið vera að Internetið verði rekið sjálfstætt, þ.e. að fasteignavefur Morgunblaðsins sé ekki greiddur niður af dagblaðinu. Vegna sumarleyfa náðist hvorki í framkvæmdastjóra Árvakurs né yfirmann fasteignavefs Morgunblaðsins í dag.