Gistihús fái ekki rekstrarleyfi

Framkvæmdastjóri Ferðaþjónustu bænda vill taka upp þá reglu að þau gistihús sem ekki uppfylli kröfur um brunavarnir fái ekki rekstrarleyfi. Þetta er mun harðari afstaða en sú sem Brunamálastofnun hefur.  Í fréttum Stöðvar 2 í gærkvöldi sögðum við frá ársskýrslu Brunamálastofnunar fyrir síðasta ár. Þar kemur meðal annars fram að ástand brunavarna er slæmt á nærri helmingi gistihúsa og er hlutfallið svipað og fyrir sjö árum. Hér er m.a. verið að tala um gistingu hjá ferðaþjónustu bænda víða um land. Brunamálastofnun segir þetta skýrast meðal annars af því að mun harðari reglur eigi við þegar gistirýmum er fjölgað, t.d. þegar heimagistingu er breytt í gistihús. Fari fjöldi gesta yfir 20 gilda sömu reglur og um hótel. Þá þarf brunaviðvörunarkerfi, eldþolna veggi og hurðar og teikningar af flóttaleiðum svo eitthvað sé nefnt. Til að koma til móts við rekstaraðila er þeim gefin kostur á bráðabirgðaaðgerðum, sem dæmi að mála herbergin með eldþolinni málningu. Sævar Skaptason, framkvæmdastjóri ferðaskrifstofu bænda, segist hvetja sína félagsmenn til að bæta úr brunavörnum og hann vill herða eftirlitið. Honum finnst að taka eigi svigrúmið sem nú sé til staðar fastari tökum og að ekki skuli veita þeim, sem ekki uppfylli kröfur um brunavarnir, rekstrarleyfi.