Fyrsta áfanga tvöföldunar að ljúka

Umferð verður hleypt á fyrsta áfanga tvöfaldrar Reykjanesbrautar þann 29. júlí nk., fjórum mánuðum fyrr en áætlað var. Samkvæmt útboði áttu verktakar að ljúka fyrsta áfanganum þann 1. desember á þessu ári. Halldór Ingólfsson stöðvarstjóri segir framkvæmdir hafa gengið ágætlega og að samkomulag hafa tekist við Vegagerðina um að opna fyrir umferð um næstu mánaðamót. Tímapunkturinn sé heppilegur fyrir alla aðila en haldið verði áfram við frágang á brautinni eftir það. Steinþór Jónsson, formaður áhugahóps um örugga Reykjanesbraut, segist afar ánægður með þessa niðurstöðu en hópurinn hefur þrýst mikið á framgang verksins. Verktakafyrirtækin sem vinna að breikkun vegarins, Háfell, Eykt og Jarðvélar, hafa unnið með áhugahópnum frá upphafi framkvæmda og segir Steinþór fyrirtækin hafa sýnt þrýstingi almennings vegna framkvæmdanna skilning. Þau hafi lagt sitt af mörkum þegar allar leiðir virtust lokaðar í málinu. Samkvæmt vegaáætlun liggur ekki fyrir hvenær hafist verður handa við breikkun seinni hluta brautarinnar en það eru næstu 12 kílómetrar.