Lögreglan hæfilega bjartsýn

Lögreglan er hæfilega bjartsýn á að leysa Stórholtsmálið innan skamms. Hún mun óska eftir framlengingu á gæsluvarðhaldi yfir fyrrverandi sambýlismanni Sri Rhamawati sem saknað hefur verið í tvær vikur. Niðurstöður úr DNA-rannsóknum liggja fyrir í þessari viku.  Fyrrverandi sambýlismaður hinnar 33ja ára gömlu Sri Rahmawati var handtekinn fljótlega eftir að tilkynnt var um hvarf hennar. Ákvað lögreglan strax að auglýsa ekki eftir Rhamawati þar sem vísbendingar á heimili mannsins í Stórholti bentu til glæps. Hann neitar enn sök en tveggja vikna gæsluvarðhald yfir honum rennur út á miðvikudag og mun lögreglan væntanlega óska eftir því að það verði framlengt. Niðurstaðna úr DNA-rannsóknum er að vænta í þessari viku en lögreglan hefur unnið markvisst að rannsókn málsins. Hörður Jóhannesson yfirlögregluþjónn segist hæfilega bjartsýnn um að málið leysist innan skamms. Það þýði samt ekki að lögreglan geti upplýst fjölmiðla og þjóðina um hvert einasta skref sem tekið sé því ekkert sé „klárt“ á þessu stigi.