Landsvirkjun þvingar ekki bændur

Landsvirkjun mótmælir því að fyrirtækið neyði bændur á Austurlandi til samninga þrátt fyrir að til standi að óska eftir eignarnámi á jörðum þeirra. Talsmaður fyrirtækisins segir eðlilega staðið að málum. Landsvirkjun hefur fengið heimild frá stjórnvöldum til að leggja háspennulínu austur á Héraði vegna Kárahnjúkavirkjunar og liggur línan víða um eignarlönd manna. Samið hefur verið við fjölda þeirra en ekki hefur tekist að ná samkomulagi við fimm bændur sem telja að Landsvirkjun setji þeim úrslitakosti og þvingi þá til samninga. Fyrirtækið hefur óskað eftir leyfi iðnaðarráðherra til að krefjast eignarnáms á jörðum þeirra. Sigurður Arnalds, talsmaður Landsvirkjunar vegna Kárahnjúkavirkjunar, segir fyrirtækið að sjálfsögðu reyna fyrst að ná samkomulagi við landeigendur með friði og spekt. Ef mönnum sýnist það ekki takast er málinu vísað til matsnefndar eignarnámsbóta þar sem óvilhallir menn fara yfir málið. Sigurður segir Landsvirkjun hlíta niðurstöðum nefndarinnar og vísar því alfarið á bug að fyrirtækið þvingi bændur. Myndin er af Sigurði Arnalds, talsmanni Landsvirkjunar vegna Kárahnjúkavirkjunar.