Hvalveiðar verði leyfðar á ný

Formaður Alþjóða hvalveiðiráðsins ætlar að leggja til að hvalveiðar í atvinnuskyni verði leyfðar á ný á ársfundi ráðsins sem hefst á morgun. Formaður íslensku sendinefndarinnar segir þetta stærsta skrefið í baráttunni fyrir hvalveiðum í áratug. Samtök ferðaþjónustunnar fagna því ef sátt næst um hvalveiðar. Á ársfundi Alþjóða hvalveiðiráðsins í fyrra hótuðu Japanar að ganga úr ráðinu vegna átaka um hvalveiðar í atvinnuskyni en þeir hafa, ásamt Íslendingum, stundað vísindaveiðar undanfarið. Ársfundurinn hefst á morgun á Ítalíu og hefur formaður hvalveiðiráðsins, Daninn Hendrik Fisher, lagt til að veiðar verði leyfðar í atvinnuskyni eftir tæplega tuttugu ára bann. Stefán Ásmundsson, formaður íslensku sendinefndarinnar, segir Hendrik Fisher hafa beitt sér verulega fyrir þessu frá því hann tók við formennsku í ráðinu í fyrra. Stefán segir að í stuttu máli sé þetta tilraun til að ná saman annars vegar þeim ríkjum sem styðja sjálfbærar hvalveiðar, og hins vegar þeim „miðjuríkjum“ sem eru á móti hvalveiðum sem fara fram utan stjórnar Alþjóða hvalveiðiráðsins, en ekki þeim veiðum sem lúta stjórn ráðsins. Norðmenn eru þeir einu sem veiða hvali í atvinnuskyni og hafa gert það í ellefu ár. Stefán Ásmundsson tekur undir með japönsku sendinefndinni sem segir þetta í fyrsta sinn sem eitthvað þokist í átt að því að hvalveiðar í atvinnuskyni verði leyfðar á ný. Hann segir þetta vera stærsta skrefið fram á við í mjög langan tíma innan hvalveiðiráðsins. Jón Karl Ólafsson, formaður Samtaka ferðaþjónustunnar, segir það ekkert óeðliegt þótt hvalveiðiráðið leyfi veiðar og fagnar hann því ef sátt næst um málið innan alþjóðasamfélagsins; slíkt dragi úr slæmri ímynd landsins. Stuart Chapman, hjá náttúruverndarsamtökunum World Wildlife Fund, telur hins vegar að Alþjóða hvalveiðiráðið eigi að beina kröftum sínum í að vernda hvali. Hann segir að ef þessar hótanir verði ekki teknar fyrir á ráðstefnunni muni arfleifð þessar og síðustu aldar koma fram á margvíslegan hátt. Tjónið muni lýsa sér í stöðugri fækkun tegunda í útrýmingarhættu, sem og ástsælustu og best þekktu tegundanna.