Einmanalegt og drungalegt á vetrum

"Fólk fer burt til þess að fara í framhaldsskóla og hefur kannski ekkert mikið að sækja til þess að fara til baka," segir Guðmundur Vignir Þórðarson. Guðmundur er tæplega þrítugur og flutti á höfuðborgarsvæðið frá Hólmavík fyrir rúmlega tíu árum þegar hann hóf framhaldsskólanám. Guðmundur starfar nú sem sölumaður í verslun. Foreldrar Guðmundar eru búsettir á Hólmavík og segist Guðmundur sækja bæinn heim mörgum sinnum á ári. Guðmundur telur þó ólíklegt að hann muni í framtíðinni flytja aftur til Hólmavíkur. "Það er fínt að vera þarna á sumrin en á veturna er voðalega einmanalegt og drungalegt," segir Guðmundur sem segir lítið félagslíf og lítið við að vera á Hólmavík. "Lífið í dag er þannig að það þarf alltaf einhverja skemmtidagskrá," segir Guðmundur. "Það er ekki hægt að finna sér sjálfur eitthvað við að vera." "Það horfir ágætlega við okkur fjölskylduna að vera hér úti á hjara," segir Þórður Sverrisson, faðir Guðmundar, sem rekur verktakafyrirtæki á Hólmavík. Að sögn Þórðar líta þau björtum augum á framtíðina og bendir á að ein dóttir þeirra hjóna sé flutt til baka frá Reykjavík með ung börn sín. Þórður segir þó að sé því miður ekki mjög algengt að ungt fólk sem alist hafi upp á Hólmavík flytji til baka eftir námslok. Hann segir meginástæðu þess vera skortur á atvinnu við hæfi. "Krakkarnir vilja koma heim en leggja oft ekki í það vegna þess að þau geta ekki fengið vinnu við það sem þau vilja starfa við."