Margar ástæður að baki

Vilhjálmur Þ. Vilhjálmsson, formaður Sambands íslenskra sveitarfélaga, telur margar ástæður liggja að baki þess að ungt fólk flytur af landsbyggðinni. "Þar eru takmarkaðri atvinnumöguleikar fyrir menntað fólk auk þess sem foreldrar fylgja ungmennum sem sækja framhaldsnám sem ekki er hægt að stunda í heimabyggð," segir Vilhjálmur. Vilhjálmur bendir einnig á að breytingar á atvinnuháttum, til dæmis í sjávarútvegi, hafi orðið til þess að störfum hafi fækkað. Að sögn Vilhjálms hafa sveitarfélögin takmörkuð úrræði til þess að bregðast við samdrætti vegna breytinga í atvinnulífinu önnur en að skapa almenn skilyrði fyrir atvinnureksturinn í hverju einstöku sveitarfélagi. "Það eru sveitarfélögin að gera vítt og breitt um landið með margvíslegum hætti," segir Vilhjálmur. Vilhjálmur bendir á að verið sé að leitast við að breyta þessari þróun í sveitarfélögunum og nefnir framkvæmdir á Austurlandi sem dæmi þar sem þær hafi skapað ýmis atvinnutækifæri fyrir ungt fólk. "Það sýnir að ríki, sveitarfélög og öflug atvinnufyrirtæki geta snúið búsetuþróuninni við leggist þau á eina sveif með samstilltu átaki." Vilhjálmur segir auk þess fleiri úrræði til að halda ungu fólki í sinni heimabyggð, ekki síst með því að efla nærþjónustu við íbúa. "Með eflingu og stækkun sveitarfélaganna eykst þjónusta þeirra við börn, ungmenni og barnafjölskyldur og sú þróun ætti að draga úr flutningum ungs fólks af landsbyggðinni."