Alltaf ljóst að afbrot var framið

Það hefði engu skilað að auglýsa strax eftir Sri Rahmawati þar sem ljóst var frá upphafi að afbrot hefði verið framið að sögn Harðar Jóhannessonar yfirlögregluþjóns. Rahmawati hefur verið saknað í tvær vikur. Fyrrverandi sambýlismaður hennar neitar enn sök. Á mánudaginn verða tvær vikur liðnar frá því ættingjar hinnar 33ja ára gömlu Sri Rahmawatis tilkynntu lögreglunni um hvarf hennar en síðast var vitað um ferðir hennar til barnsföður síns og fyrrverandi sambýlismanns í íbúð hans við Stórholt. Lögreglan hefur unnið markvisst að rannsókn málsins en fyrrverandi sambýlismaður Rhamawatis hefur setið í gæsluvarðhaldi vegna gruns um að aðild að hvarfi hennar. Samkvæmt heimildum fréttastofu hefur rannsóknardeild lögreglunnar sérstaklega leitað eftir förum eftir Dick Cepec jeppadekk við malar- og grjótnámur í Kollafirði og við Geldingarnes. Við síðarnefnda staðinn fundust á tveimur stöðum skýr för eftir þannig jeppadekk. Hörður Jóhannesson segir lögregluna að sjálfsögðu vera að leita að ummerkjum en vill ekki gangast við því að leitin snúist eitthvað „sérstaklega um jeppaför“. Að öðru leyti vill hann ekki fara nánar út í það. Aðspurður hvers vegna ekki hafi verið auglýst eftir Rahmawati  segir Hörður að á vettvangi hafi verið ummerki um að hugsanlega hafi eitthvert brot verið framið. Því var málið metið þannig að ekki væri til neins að auglýsa eftir konunni.