Bændum settir úrslitakostir

Landsvirkjun setur bændum úrslitakosti og þvingar þá til samninga, segir einn þeirra fimm bænda sem stendur frammi fyrir eignarnámi vegna rafmagnslína frá Kárahnjúkavirkjun. Hann segir þá ekkert fá fyrir að gefa eftir jarðir sínar. Vegna lagningu rafmagnslína frá Kárahnjúkavirkjun hefur Landsvirkjun þurft að semja við fjölda bænda á Héraði. Landsvirkjun hefur hins vegar ekki tekist að ganga frá samningum við fimm bændur og hefur fyrirtækið óskað eftir leyfi iðnaðarráðherra til að krefjast eignarnáms á jörðum þeirra. Guðmundur Ármannsson, bóndi á Vaði í Skriðdal sem er einn umræddra bænda, segir þá munu berjast gegn framkvæmdunum. Hann gagnrýnir vinnubrögð Landsvirkjunar í málinu og segir ekki um neina samninga að ræða; mönnum sé bara settir úrslitakostir. Guðmundur segir þetta hafa verið vinnubrögð Landsvirkjunar í gegnum tíðina og því komi þetta svo sem ekki á óvart. Guðmundur segist ekki hafa nokkra trú á framkvæmdunum fyrir austan. Þetta sé fyrirfram dæmt til að mistakast umhverfislega, efnahagslega og félagslega fyrir svæðið. Hann segir Landsvirkjun brjóta á bændunum með því að skerða þann rétt sem þeir eiga samkvæmt stjórnarskrá. Meðfylgjandi mynd er frá Kárahnjúkum.