Yfir Hellisheiðina í hjólastólum

Tveir ungir menn, Arnar Klemensson og Alexander Harðarson, eru þessa stundina á leið til Reykjavíkur yfir Hellisheiðina í hjólastólum. Þeir lögðu af stað frá Hveragerði klukkan 9 í morgun og áætla að koma að Barnaspítala Hringsins um klukkan 15 í dag. Tilgangur ferðarinnar er að styrkja Barnaspítala Hringsins en báðir mennirnir, sem hafa verið bundnir við hjólastóla frá fæðingu, eyddu miklum tíma þar sem börn vegna fötlunar sinnar. Viðar M. Þorsteinsson, aðstoðarmaður mannanna, sagði í samtali við fréttamann í hádeginu að ferðin hafi gengið ótrúlega vel. Áætlað hafi verið að það tæki Arnar og Alexander u.þ.b. þrjá klukkutíma að komast upp Kambana en þeir hafi svo ekki verið nema tvær klst. að því. Þau átök tóku í að sögn Viðars en kapparnir væru miklir naglar.  Arnar og Alexander voru u.þ.b. hálfnaðir í hádeginu en Viðar þorði ekki að fullyrða hvort tímaáætlun myndi standast. Hann vonar hins vegar það besta en þess má geta að lögreglan og Sniglarnir fylgja Arnari og Alexander þessa leið. Þeir sem vilja heita á þá félaga og styrkja Barnaspítala Hringsins er bent á reikning Barnaspítalans: banki 517, höfuðbók 14, reikningur 100033, kennitala 590793-2059. Fylgst verður með ferð Arnars og Alexanders í fréttum Stöðvar 2 í kvöld. Hægt er að hlusta á viðtal við Viðar M. Þorsteinsson, aðstoðarmann kappanna, með því að smella á hlekkinn sem fylgir fréttinni.