Gekkst undir aðgerð

Maðurinn sem varð fyrir hnífsstungunni í Barmahlíð í nótt gekkst undir aðgerð í morgun. Að sögn vakthafandi læknis á skurðdeild er líðan mannsins eftir atvikum góð og er hann ekki lífshættulega slasaður. Kona er í haldi lögreglunnar í Reykjavík eftir að hafa stungið manninn í kviðinn. Hann var gestkomandi hjá henni í samkvæmi sem hafði verið í nótt í kjallaraíbúð konunnar við Barmahlíð í Reykjavík og að sögn lögreglunnar hafði mikið gengið þar á. Um klukkan sex í morgun hafði konan samband við lögregluna og óskaði eftir aðstoð hennar við að koma þremur gestum út úr íbúðinni. Ekki vildi betur til en svo að þegar lögreglan kom á staðinn til að vísa gestunum út, þá greip konan til steikarhnífs og stakk einn gestanna í kviðinn. Konan hafði handleggsbrotnað fyrr um kvöldið og fengið aðhlynningu á sjúkrahúsi og segir lögreglan að hún hafi sagst vera að hefna sín fyrir handleggsbrotið þegar hún stakk manninn.