Vilja háskóla á Vestfjörðum

Nú í hádeginu er verið að fremja gjörning á Silfurtorgi á Ísafirði þar sem skorað er á yfirvöld, með táknrænum hætti, að stofna Háskóla Vestfjarða. Um fjögur hundruð manns á Vestfjörðum stunda fjarnám á háskólastigi og segja íbúar á svæðinu að stofnun háskóla sé löngu tímabær. Það er Götuleikhúsið Morrinn sem fremur gjörninginn á Silfurtorgi í miðbæ Ísafjarðar en í honum er sett á svið fyrsta kennslustundin í Háskóla Vestfjarða. Ennfremur verður flutt yfirlýsing ráðstefnunnar „Með höfuðið hátt“ sem sett var í bænum í gærkvöldi en á henni er m.a. verið að ræða leiðir til að efla menninguna í landshlutanum. Með gjörningnum er tilgangurinn að skora á yfirvöld að stofna háskólann sem talið er að geti haft mjög mikla þýðingu. Albertína Elíasdóttir, formaður undirbúningsnefndar fyrrnefndrar ráðstefnu, segir að með þessu móti sé verið að skora á yfirvöld með jákvæðum hætti. Henni finnst löngu tímabært að svarað sé kalli nemenda og stofnaður sé háskóli á Vestfjörðum og bendir á jákvæða uppbyggingu sem skapast við tilkomu háskóla, t.a.m. á Akureyri og í Tromsö í Noregi. Bæði aukist fjöldi menntaðs fólks á svæðinu og fjölmörg störf skapist í tengslum við þjónustu við skólann.  Hægt er að hlusta á brot úr viðtali við Albertínu úr hádegisfréttum Bylgjunnar með því að smella á hlekkinn sem fylgir fréttinni. Meðfylgjandi mynd er frá Ísafirði.