Tefst um nokkrar vikur

Sprungur og gljúpur jarðvegur í farvegi Jöklu, þar sem aðalstífla við Kárahnjúka á að standa, tefur verkáætlun við stíflugerðina um nokkrar vikur. Verkefnisstjóri Impregilo segir að vandinn sé yfirstíganlegur og frávikin svo lítil að þau skipti engu að lokum. Fulltrúar fjölmiðla fóru um framkvæmdasvæðið í gær í boði Landsvirkjunar. Á kynningarfundi kom fram að framkvæmdir væru ýmist á áætlun eða nokkuð á undan áætlun, t.a.m. hefði gengið vonum framar að bora í bergið með risaborum. Hins vegar hefur sjálf stíflugerðin við Kárahnjúka tafist nokkuð þar sem botninn í farvegi Jöklu hefði ekki verið sú trausta undirstaða sem vænst var. Bæði væri lengra niður á klöpp en menn vonuðu og svo reyndust vera í honum sprungur sem þarf að fylla. Gianni Protta, verkefnisstjóri verktakafyrirtækisins ítalska Impregilo, hefur samt engar áhyggjur. Hann segir einu vandamálin við framkvæmdirnar sé árfarvegurinn en að þau verði leyst, og þótt þau tefji stíflugerðina um fáeinar vikur verði það unnið upp.