Lífsgæði á Íslandi í sjöunda sæti

Ísland er í sjöunda sæti yfir þau lönd sem njóta mestra lífsgæða samkvæmt nýútkominni skýrslu Þróunaráætlunar Sameinuðu þjóðanna. Ísland var í öðru sæti listans í fyrra. Könnunin nær yfir 177 lönd í heiminum. Átta efstu ríkin eru þau sömu og í fyrra en sum hver skipta um sæti. Noregur er í efsta sæti listans, rétt eins og í fyrra en Svíþjóð og Ástralía eru í öðru og þriðja sætinu og Bandaríkin eru í áttunda sæti. Japan er efsta Asíuríkið á listanum í níunda sæti, en næst er Hong Kong númer 23. Slóvenía er í 27. sæti, efst af löndum Austur-Evrópu, og Lýbía er efsta Afríkuríkið á listanum í 58. sæti, en í þremur neðstu sætunum eru Búrkína Faso, Níger og Síerra Leóne. Í skýrslunni er tekið mið af þrem þáttum við mat á ríkjum; langlífi og heilsufari íbúa, menntunarstigi og lífsgæðum eða vergri landsframleiðslu. Þróun allra efstu ríkjanna hefur ýmist verið jákvæð eða staðið í stað, en í fátækustu ríkjum heims má greina afturför, það er meiri fátækt og minni lífslíkur, sem má að miklu leyti rekja til alnæmisvandans.