Íslendingar borða lítinn fisk

Íslendingar borða helmingi minni fisk en ný skýrsla Sameinuðu þjóðanna gerir ráð fyrir að sögn Laufeyjar Steingrímsdóttur hjá Lýðheilsustöð. Í skýrslu Sameinuðu þjóðanna er vísað í upplýsingar frá Matvæla- og landbúnaðarstofnun Sameinuðu þjóðanna en þar kemur fram að fiskneysla Íslendinga sé sú næsthæsta í heimi og aðeins eyjarskeggjar á Maldivíeyjum skáka Íslendingum í þessum efnum. Í skýrslunni er gert ráð fyrir að hver Íslendingur borði um 90 kíló af fiski á ári. Laufey segir þessar tölur ekki byggja á áreiðanlegum gögnum heldur er um að ræða áætlaðar og framreiknaðar tölur. Samkvæmt upplýsingum frá Manneldisráði og Hagstofu Íslands er nær lagi að hver Íslendingur borði um 44 kíló af fiski á ári, sem er litlu minni fiskneysla en í Noregi. Laufey segir að verulega hafi dregið úr fiskneyslu Íslendinga síðastliðin áratug, aðallega vegna aukins framboðs af skyndibitafæði og háu fiskverði.