Fundi frestað í allsherjarnefnd

Fundi í allsherjarnefnd Alþingis var slitið nú rétt fyrir fréttir og verður ekki framhaldið fyrr en í fyrsta lagi á morgun. Formaður Samfylkingarinnar segir að stjórnarmeirihlutinn geti ekki komið sér saman í málinu og að ríkisstjórnin sé að springa. Formaður allsherjarnefndar hafnar því að beðið sé eftir skipunum frá formönnum stjórnarflokkanna. Fundur í allsherjarnefnd hóst klukkan 9 í morgun. Þá komu fulltrúar frá Samkeppnisstofnun á fund nefndarinnar, en þar með hefur nefndin tekið við öllum athugasemdum, skriflegum og munnlegum vegna fjölmiðlafrumvarpsins. Stjórnarandstaðan vildi afgreiða málið úr nefndinni strax og liggur uppkast að nefndaráliti stjórnarandstöðunnar þegar fyrir. Fundi var þá óvænt slitið rétt fyrir hádegi og hefur ekki verið ákveðið hvenær nefndin hittast að nýju. Bjarni Benediktsson, formaður allsherjarnefndar, segir eðlilegar skýringar á því. Hann segir að fara verði vandlega yfir þau gögn og upplýsingar sem nefndinni hafi borist á undanförnum dögum. Meirihlutinn hafi talið rétt að taka ígrundaða afstöðu til þeirra álitaefna sem upp hafi komið. Bjarni sagði að menn gætu haft sýnar skýringar á því hvernig starfað væri í nefndinni en tók fálega í þá hugmynd að verið væri að bíða eftir því að Halldór Ásgrímsson og Davíð Oddsson segðu þeim hvað þau ættu að gera. Hann sagðist halda því opnu hvort haldinn yrði fundur í nefndinni á morgun en ekki hefði verið boðað til hans formlega ennþá. Össur Skarphéðinsson, formaður Samfylkingarinnar, segir að stjórnarmeirihlutinn geti ekki komið sér saman í málinu og að ríkisstjórnin sé að springa vegna fjölmiðlafrumvarpsins. Nú þurfi fulltrúar stjórnarflokkanna í allsherjarnefnd að slíta fundi til að bíða eftir boðum frá formönnum stjórnarflokkanna. Honum finnst staða málsins æði skrítin. Ekki hafi tekist að afgreið málið út úr allsherjarnefnd í gær og allsendis óvíst sé hvenær næsti fundur nefndarinnar verði. Hann segir ljóst að það sé ósamstaða innan stjórnarinnar hvernig eigi að taka á málinu og að logandi ágreiningur sé milli flokka.