Brotist inn í fyrirtæki

Lögreglan í Reykjavík handtók mann í morgun, eftir að hann hafði brotist inn í fyrirtæki á Ártúnshöfðanum. Maðurinn hafði skömmu áður ekið bifreið sinni útaf og sást glögglega á öryggismyndavélum er hann hljóp sem fætur toguðu úr bílnum og braust inn í fyrirtækið. Hann hafði varla náð að athafna sig þar innandyra þegar lögregla kom á staðinn og handtók hann. Þá var brotist inn í sendibifreið í Skeifunni um fjögurleytið í nótt. Rúða var brotin á bifreiðinni og úr henni stolið skjá, sem bílstjórar nota við að bakka sendibílum. Þjófurinn er ófundinn.