Leyniskýrsla um spilltan svínakóng

Félagsmenn í Mjólkurfélagi Reykjavíkur vilja opinbera rannsókn á meintum brotum fyrrverandi stjórnarformanns félagsins, Kristins Gylfa Jónssonar. Í trúnaðarskýrslu segir að ekkert hafi komið fram í ársreikningi um 41 milljónar króna heimildarlauss peningaláns til svínabús Kristins. Lánsviðskipti við fyrirtæki Kristins Gylfa hafi verið yfir öll mörk. Í skýrslunni segir að tjón MR vegna viðskipta við fyrirtæki Kristins Gylfa nemi tæpum hálfum milljarði króna. Meðal ávirðinga á hendur Kristni Gylfa í nýrri skýrslu sem Þórarinn Viðar Þórarinsson lögmaður hefur gert fyrir stjórn MR eru viðskipti með 50 milljóna króna skuldabréf sem MR gekkst í ábyrgð fyrir á árinu 2000. Fyrirtæki Kristins Gylfa, Svínabúið Brautarholti, greiddi 7 milljóna króna skuld við MR með skuldabréfinu og fékk síðan 41 milljón króna í peningum til baka. Skuldabréfið fór skjótt í vanskil og sat MR uppi með tjónið sem ábyrgðaraðili. Kristinn Gylfi telur ekkert óeðlilegt við viðskipti þriggja fyrirtækja sinna við MR. Þórarinn Viðar segir lánsviðskipti þeirra við MR hafa farið út fyrir öll venjuleg mörk. Kristinn Gylfi sat beggja vegna borðsins sem forsvarsmaður sinna fyrirtækja annars vegar og sem stjórnarmaður MR hins vegar. Ítarlega er fjallað um málið í DV í dag.