Uppsagnir hjá Eimskip

Fækkað var um 40 til 50 stöðugildi hjá Eimskipafélagi Íslands í dag vegna skipulagsbreytinga. Trúnaðarmaður starfsmanna segir að þeim sé brugðið en er feginn að óvissu vegna boðaðra breytinga hafi verið eytt. Eimskipafélagið tilkynnti Kauphöll Íslands um breytingarnar, en þær fylgja í kjölfar skipulagsbreytinga hjá félaginu, sem boðaðar voru í maí síðastliðnum. Uppsagnir og tilfærslur á skrifstofum félagsins leiða til þess að fækkað verður um 40 til 50 stöðugildi, allir þeir sem missa vinnuna eru í Verslunarmannafélagi Reykjavíkur. Nýtt skipulag verður kynnt samhliða sex mánaða uppgjöri félagsins í lok þessa mánaðar. Hjá Eimskipfélaginu starfa um 1100 manns, eða um 800 hérlendis og um þrjú hundruð erlendis. Unnið hefur verið að breytingunum undanfarið og er markmið þeirra fyrst og fremst að auka hagkvæmni í rekstri og lækka kostnað félagsins. Aukin áhersla verður lögð á flutningastarfsemina í framtíðinni. Gunnar J. Gunnarsson, trúnaðarmaður starfsmanna Eimskipafélagsins, segir uppsagnirnar erfiðar fyrir allt starfsfólk, fólkinu sé brugðið.