Vestnorræn handverkssýning

Vestnorrænu löndin, Ísland, Færeyjar og Grænland, standa í annað sinn fyrir fjölþjóðlegri handverkssýningu í Laugardalshöll. Sýningin verður haldin dagana 15. - 19. september. Handverkssýningin "Vestnorden Arts and Crafts" er liður í vestnorrænu samstarfi og var fyrst haldin árið 2002. Þá komu þátttakendur frá 11 löndum og landssvæðum en í ár eru þau 17, Ísland, Færeyjar, Grænland, Danmörk, Noregur, Svíþjóð, Finnland, Áland, Eistland, Lettland, Litháen, Orkneyjar, Shetlandseyjar, Alaska, Nunavut (Kanada), Norðvestursvæði Ameríku og Norðvestur-Rússland. Kunnáttufólk á hverjum stað sér um að velja framlag hvers lands en búist er við að þátttakendur verði hátt á þriðja hundraðið. Sýningin er sölusýning og munu handverksmennirnir setja upp smiðjur og verkstæði í anddyri Laugardalshallarinnar og sýna handbragð sitt og smíðisgripi. Í tengslum við sýninguna verður haldin ráðstefna þar sem fjallað verður m.a. um sjálfbæra þróun, notkun hráefnis úr náttúrunni, menningu og handverk og markaðssetningu handverksmuna. Handverksmenn vinna gjarnan í þau efni sem þeir geta fundið í umhverfi sínu en á undanförnum áratugum, með aukinni hátækni og fjöldaframleiðslu, hafa menn fjarlægst þennan uppruna sinn og gömul verkmenning og þekking er á hröðu undanhaldi.