Lögreglan þegir áfram

Lögreglan þegir áfram þunnu hljóði um hvarf indónesískrar þriggja barna móður sem saknað hefur verið í níu daga. Hún segir að fréttamenn verði að geta í eyðurnar um framgang mála. Niðurstöðu rannsóknar á blóði sem fannst í íbúð manns sem grunaður er um aðild að hvarfi konunnar er enn beðið.  Það sem vitað er með vissu um rannsókn lögreglu er að blóðsýni, sem tekin hafa verið í íbúð og bíl manns sem situr í gæsluvarðhaldi, voru send til rannsóknar í Noregi til að ganga úr skugga um að þau séu úr konunni sem ættingjar tilkynntu að væri saknað á mánudag í síðustu viku. Niðurstöðu úr þeirri rannsókn er enn beðið. Samkvæmt heimildum Fréttablaðsins í dag var reynt að þrífa burt blóð í íbúð mannsins áður en rannsókn lögreglu hófst en það fæst ekki staðfest hjá lögreglu. Greint hefur verið frá því að sést hafi til mannsins bera eitthvað fyrirferðarmikið, pökkuðu inn í plast, út í bifreið sína um hádegisbil, daginn sem konan hvarf. Það fæst ekki staðfest hjá lögreglu. Þá greinir DV frá því í dag að vitni hafi gert lögreglu viðvart um þessa grunsamlegu iðju og haft orð á því að þarna virtist um líkflutning að ræða - en það fæst heldur ekki staðfest hjá lögreglu. Engin formleg yfirlýsing hefur borist frá lögreglu vegna málsins frá því það kom upp. Aðstoðaryfirlögregluþjónn sagði í dag að ekkert væri um málið að segja; menn væru að vinna sína vinnu eins vel og hægt sé. Aðspurður hvort málið væri enn rannsakað sem mannshvarf sagði yfirlögregluþjónn að menn yrðu að geta í eyðurnar.