Klipping hækkað um 10%

Klipping og önnur þjónusta hárgreiðslustofa á höfuðborgarsvæðinu hefur hækkað að meðaltali um tíu prósent frá því í nóvember árið 2002, samkvæmt nýrri könnun Samkeppnisstofnunar. Á vef stofnunarinnar kemur fram að þessi verðbreyting fylgi nokkurn veginn sömu þróun og launavísitalan. Kannaðir voru fimmtán þjónustuliðir og var mestur verðmunur á svokölluðum „stífum blæstri“ sem kostar frá 800 krónum upp í 3.800 krónur. 330% verðmunur er á lagningu sem kostar frá frá 1.000 krónum upp í 4.300 krónur. Af klippingum var mestur verðmunur á barnaklippingu fyrir fjögurra ára sem kostar á bilinu 700-3.000 krónur. Samkvæmt reglum eiga verðskrár að vera sýnilegar þar sem gengið er inná stofurnar og við afgreiðslukassa. Í þessari könnun Samkeppnisstofnunar kom í ljós að 40 prósent hársnyrtistofa eru með verskrá við inngang en tæplega 80 prósent við kassa.