Ábyrgð óljós

Byggingarnefnd Háskóla Íslands hefur ráðið verkfræðistofuna Línuhönnun til að rannsaka skemmdir á klæðingu náttúrufræðihússins Öskju í Vatnsmýrinni. Óljóst er hver ber ábyrgðina. Ríkharður Kristjánsson, forstjóri Línuhönnunar, segir rannsóknina rétt að hefjast. Haft hafi verið samband við tæringasérfræðinga hjá Iðntæknistofnun sem ætli að skoða málið í ágúst, eftir sumarfrí. Eins og Fréttablaðið greindi frá 7. júlí er klæðning hússins að gefa sig. Bygging hússins hófst árið 1997 og kennsla í húsinu þann 7. janúar síðastliðnum. "Það eru greinilega skemmdir í klæðningunni og það þarf að finna leiðir til þess að stöðva þær og laga," segir Ríkharður. Ríkharður segir að rannsóknin beinist að öllum þeim þáttum sem geti valdið skemmdunum, þá helst að festingum klæðningarinnar svokölluðum hnoðum sem og hvort málningin hafi sprungið á þeim og hleypt að raka og salti. "Í fyrsta lagi þurfum við að finna út hvað þarf að gera og hvernig hægt er að laga þetta. Í framhaldinu verður til einhver viðgerðarkostnaður og skoða þarf hver beri ábyrgð á honum. Hvort sem það eru hönnuðir, verktakar eða aðrir þá eru þeir tryggðir fyrir svona skakkaföllum. Það er ekki þannig að húsbyggjandi sitji uppi með svona skaða."