Meistaranám í lögfræði hófst í dag

Framhaldsnám í lögfræði er nú í fyrsta sinn kennt við íslenskan háskóla utan Háskóla Íslands en í dag hófst kennsla í meistaranámi í lögfræði við Viðskiptaháskólann á Bifröst. Hægt er að ljúka tveimur mismunandi gráðum á meistarastigi við skólann, ML-gráðu í lögfræði og MS-gráðu í viðskiptalögfræði. Í tilkynningu frá Bifröst kemur fram að Runólfur Ágústsson rektor hafi í setningarræðu sinni gagnrýnt æðstu embættismenn þjóðarinnar og stjórnmálaleiðtoga á Alþingi fyrir stóryrði í stað málefnalegrar umræðu um grundvallaratriði í íslenskri stjórnskipan. Runólfur sagði slíkt ekki efla virðingu almennings fyrir stjórnkerfi landsins.