Blóð fannst í bíl hins handtekna

Fjörtíu og fimm ára gamall maður var úrskurðaður í tveggja vikna gæsluvarðhald í Héraðsdómi Reykjavíkur í tengslum við hvarf á fyrrverandi sambýliskonu hans og barnsmóður. Lögreglan hefur rökstuddan grun um að maðurinn tengist hvarfi konunnar sem er þriggja barna móðir. Maðurinn hefur neitað við yfirheyrslur að eiga nokkurn hlut í hvarfi konunnar, en grunur leikur á því að hann hafi banað henni. Lögreglan vinnur enn að vettvangsrannsókn á heimili mannsins og nágrenni þess. Grænn Nissan Patrol jeppi í eigu mannsins var fluttur á brott með kranabíl til frekari skoðunar. Leitað er að lífsýnum og annars konar sýnum sem verða rannsökuð. Samkvæmt heimildum Fréttablaðsins fannst blóð bæði heima hjá manninum í Stórholti og inni í jeppanum. Haglabyssa fannst á heimili mannsins en ekki er endilega talið að byssan tengist hvarfi konunnar. Byssan fannst á öðrum stað í húsinu en vísbendingarnar um hvarf konunnar. Síðast spurðist til konunnar á sunnudagsmorgun og er talið að hún hafi verið á heimili mannsins. Leit lögreglu hófst eftir að ættingjar konunnar leituðu til lögreglunnar. Þegar blaðið fór í prentun í gær hafði ekki enn spurst til konunnar. Konan hafði áður kært manninn fyrir líkamsárás en hann var sýknaður vegna ónægra sannanna. Ingimundur Pétursson, hjá Félagi einstæðra foreldra, segir félagið hafi kært manninn síðasta sumar fyrir eignarspjöll á húsnæði á Öldugötu sem félagið átti og konan leigði. Hann segir lögregluna hafa fallið frá því máli.