Vatnsrennsli í Elliðaár handstýrt

Mælst er til þess að vatnrennsli í Elliðaár verði handstýrt og að enginn veiðimaður hafi með sér meira en einn lax í soðið úr ánum í sumar. Þetta er meðal þeirra tillagna sem er að finna frá samráðshópi um Elliðaár sem hefur það markmið að vernda árnar og lífríki þeirra. Fram hefur komið að fiskistofnar í ánni eru misvel haldnir og laxinn eigi undir högg að sækja. Undanfarin tvö ár hafa um 1200 laxar gengið í árnar og veiðimenn veitt um 500 úr göngum hvort ár. Þetta telst mikið veiðiálag miðað við að stofninn er í verulegri lægð um þessar mundir. Því verður þeim tilmælum beint til veiðimanna að þeir sleppi sem mest. Stefán Jón Hafstein, formaður samráðshóps um Elliðaár, segir aðspurður hvort þá sé öll gleði ekki farin úr veiðunum það ekki vera svo. Það sé ekki mikill gleði samfara því að drepa lax ef maður veit að hann er betur kominn í ánni til að hrygna. Sambýli við virkjun í ánum, sem þar hefur verið frá upphafi 20. aldar, hefur verið gagnrýnt og hópurinn leggur til að vatnsflæði til ánna verði stjórnað eins og frekast er unnt til verndunar lífríkisins. Þá segja fulltrúar Reykjavíkurborgar frárennsli frá fyrirtækjum við ósa ánna í óviðundandi ástandi en síðast í gær rann úrgangur frá steypustöðinni BM-Vallá í árnar. Stefán Jón segir ástandið hafa batnað mikið undanfarin ár en samt sé það enn í gjörgæslu hjá borgarstjórn.