Vilja minnka veiðiálag í Elliðaám

Samráðshópur um málefni Elliðaánna á vegum borgarráðs leggur til að þeim tilmælum verði beint til veiðimanna í sumar að þeir hlífi laxi sem mest með því að sleppa veiddum laxi. Hópurinn leggst ekki gegn því að áhugasamir taki sér fisk í soðið en vill stefna að því að veiðiálag verði minnkað. Hópurinn hefur leitað til Stangveiðifélags Reykjavíkur um að tilmælum þessa efnis verði beint til veiðimanna og þeim gefnar leiðbeiningar um hvernig skuli sleppa laxi ósködduðum. Bergur Steingrímsson, framkvæmdastjóri Stangveiðifélags Reykjavíkur, segist fagna öllum tillögum sem lúta að vernd og viðhaldi vistkerfisins við Elliðaár og tilmælum þessa efnis verði komið til veiðimanna. "Það verður svo að koma í ljós hvernig menn bregðast við þessu." Samráðshópurinn leggur einnig til að rennsli úr Elliðaárvirkjun verði stýrt, að úttekt á notagildi settjarna verði hraðað, að styrkveitingu úr fiskræktarsjóði verði fylgt eftir og að hundrað metra árhelgi verði virt.