Uppbygging í Súðavík

Súðavíkurhreppur hefur ákveðið að byggja tvö 500 fermetra atvinnuhúsnæði og tvö einbýlishús. Ekkert atvinnuhúsnæði hefur verið byggt í Súðavík síðustu 24 árin. Ómar Már Jónsson, sveitarstjóri Súðavíkurhrepps, segir að horft sé til iðnaðar- og jafnvel fiskvinnslustarfsemi í húsunum sem verði tilbúin næsta haust. "Stefnt er að því að skapa skilyrði til fjölbreyttari atvinnu þannig að það megi fjölga í byggðinni." Ómar segir sveitarfélagið því einnig ráðast í byggingu einbýlishúsa. "Hugmyndin er að selja þessi hús og ef að það gengur eftir þá ætlum við að skoða að byggja tvö til viðbótar." Ómar segir að eftir að formlegum flutningi byggðarinnar lauk vegna snjóflóðsins hafi ekkert verið byggt í bænum. "Fólk hefur töluvert hringt inn og verið að forvitnast um húsakost og atvinnu. Það verður að segjast eins og er að við höfum ekki getað tekið við því fólki sem hingað vill koma."