Stefna forstjóra Heilsugæslunnar

Stjórn Félags hjúkrunarfræðinga hefur ákveðið að stefna Guðmundi Einarssyni, forstjóra Heilsugæslunnar í Reykjavík fyrir Félagsdóm brot á lögum um stéttarfélög og vinnudeilur. Í júníbyrjun fékk hluti hjúkrunarfræðinga sem starfa við Miðstöð Heimahjúkrunar í Reykjavík bréf frá forstjóranum. Meðfylgjandi bréfinu var "þakklætisvottur fyrir þá trúmennsku og ósérhlífni..." sem viðkomandi starfsmenn sýndu í "...þeim erfiðleikum sem steðjuðu að Miðstöð Heimahjúkrunar í mars..." Téður þakklætisvottur var gjafakort í Heilsulind fyrir konur að verðmæti sautján þúsund króna. Í bréfinu frá forstjóranum er vísað til þess þegar hluti hjúkrunarfræðinga sagði starfi sínu lausu í kjölfar uppsagna á aksturssamningum og fengu þeir hjúkrunarfræðingar sem sögðu upp störfu ekki umrædda umbun. Í fjórðu grein laga um stéttarfélög og vinnudeilur er ákvæði sem leggur bann við að atvinnurekendur hafi afskipti af vinnudeilum og áhrif afstöðu starfsmanna fjárgreiðslum, loforðum um hagnað eða neitunum á réttmætum greiðslum. Elsa Friðfinnsdóttir, formaður Félags íslenskra hjúkrunarfræðinga telur að "þakklætisvottur" forstjórans hafi brotið jafnræðisreglu, því þeim starfsmönnum sem nýttu lögbundin réttindi hafi ekki verið boðin nein umbun eftir að málið var leyst. "Félagsdómur þarf að úrskurða hver tímaramminn er í þessu máli," segir Elsa. "Það er okkar skilningur að þetta sé jafngildi fégreiðsla og eini hópurinn sem ekki fékk umbun var hópurinn sem barðist fyrir að halda þeim kjörum sem sagt var upp, en allur hópurinn naut afraksturins. Hann umbunar því þeim hjúkrunarfræðingum og sjúkraliðum sem af persónulegum ástæðum gátu ekki sagt upp." Guðmundur Einarsson, forstjóri Heilsugæslunnar segist ekki skilja hvernig eigi að leggja málið undir Félagsdóm með vísan í lög um stéttarfélög og vinnudeilur. "Okkar afstaða hefur verið sú að það átti sér ekki stað vinnudeila í venjulegum skilningi heldur sagði starfsfólk einfaldlega upp. Ég hef engu við það að bæta."