Sala fasteigna fyrir 1,2 milljarða

Tillaga meirihluta bæjarráðs Vestmannaeyja, að fela bæjarstjóra að ganga til viðræðna við Fasteign hf. um sölu á fasteignum bæjarins fyrir allt að 1,2 milljarð króna, var samþykkt á fundi bæjarráðs í gær. Fulltrúi minnihlutans lagðist gegn tillögunni. Þetta kemur fram á vefnum www.sudurland.net í dag. Vestmannaeyjabær mun gerast aðili að félaginu með hlut upp á 15% af söluverðmætinu. Í greinagerð fulltrúa meirihlutans, þeirra Andrésar Sigmundssonar (B) og Stefáns Jónasonar (V), segir m.a. að ljóst sé að verkefninu fylgja bæði kostir og gallar. Séu þeir hins vegar metnir telja þeir að kostirnir séu þyngri á metunum en gallarnir. Losað sé um fjármagn til að greiða niður óhagstæð lán sem eru íþyngjandi fyrir rekstur bæjarins og farið verður í að koma þeim fasteignum sem seldar verða í gott horf. Einnig er ljóst að Vestmannaeyjabær verður aðili að stærri rekstrareiningu og í því felist nokkrir kostir, s.s. áhættudreifing, lægri viðhalds- og endurnýjunarkostur, minni rekstrarumsvif og gegnsæi í útgjöldum vegna fasteigna félagsins. Arnar Sigurmundsson (D) lagðist gegn tillögunni og gerði það að tillögu sinni að skoðaðir verði kostir þess að Vestmannaeyjabær stofni eigið fasteignafélag líkt og sveitarfélagið Árborg gerði fyrir skömmu. Telur hann mikilvægt að bæjarfélagið verði eigandi þeirra mannvirkja sem nauðsynleg eru til þess að halda uppi lögboðnum verkefnum bæjarfélagsins og nýta sem best þá krafta sem felast í þekkingu og reynslu heimamanna við byggingu og viðhald fasteigna Vestmannaeyjabæjar.