Flugumferð að aukast

Greinileg aukning er að verða á flugumferð um Norður-Atlantshaf, eftir samdrátt síðustu ára vegna hryðjuverkaárásanna í Bandaríkjunum 11. september 2001 og bráðalungnabólgu-faraldursins á árunum 2002 - 2003, segir í fréttatilkynningu frá Flugmálastjórn Íslands. Það sem af er þessu ári hafa 9,5 prósent fleiri flugvélar farið um íslenska flugstjórnarsvæðið, en á fyrstu sex mánuðum ársins í fyrra.Fyrstu sex mánuði þessa árs hafa 38.383 flugvélar farið um íslenska flugstjórnarsvæðið en þær voru 36.246 á sama tímibili árið 2003. Stöðugur samdráttur var á fjölda flugvéla um flugstjórnarsvæðið á árunum 2001 til 2003. Flugumferðin náði sögulegu hámarki árið 2000 en það ár fóru 92.684 flugvélar um íslenska flugstjórnarsvæðið. Þeim fækkaði niður í 87.337 árið eftir og voru komnar niður í 78.642 í fyrra. Umferðin síðustu sex mánuði gefur vísbendingar um að þróunin sé að snúast við. Flugvélum sem fara um íslenska flugstjórnarsvæðið hefur fjölgað alla mánuðina nema í febrúarmánuði þegar þeim fækkaði um 3,6 prósentustig. Það sem af eru þessu ári hafa 2.137 fleiri flugvélar farið um flugstjórnarsvæðið en á fyrri árshelmingi ársins í fyrra. Meðfylgjandi er súlurit sem sýnir umferð um íslenska flugstjórnarsvæðið fyrstu sex mánuði áranna 2000 til 2004.