Fara ekki fram á opinbera rannsókn

Félag heyrnarlausra ætlar ekki, að svo stöddu, að fara fram á opinbera rannsókn á því hversu mörg heyrnarlaus börn hafi orðið fyrir kynferðisofbeldi. Talskona Stígamóta segir að nýlegur dómur í máli gegn heyrnarlausum manni, feli í sér alvarleg skilaboð út í samfélagið. Héraðsdómur Reykjaness dæmdi í síðustu viku heyrnarlausan manni á fertugsaldri í tveggja ára fangelsi, vegna alvarlegra kynferðisbrota gegn tveimur dætrum sínum. Maðurinn sætti sjálfur kynferðisofbeldi í heimavistarskóla fyrir heyrnarlausa í mörg ár og vegna samúðar var héraðsdómur reiðubúinn að kasta bjarghring til hans með því að skilorðsbinda dóminn að stærstum hluta. Rúna Jónsdóttir, talskona Stígamóta, segir þetta mál staðfesta það sem samtökin vissu, að þeir sem ekki geti borið hönd fyrir höfuð sér, séu í aukinni hættu á að verða fyrir ofbeldi. Hún telur dóminn fela í sér þau alvarlegu skilaboð út í samfélagið, að ofbeldi réttlæti ofbeldi og hún undirstrikar að fullorðið fólk verði að bera ábyrgð á gerðum sínum. Vegna umræðu um meint kynferðisbrot gegn heyrnarlausum einstaklingum, hefur Félag heyrnarlausra sent frá sér yfirlýsingu þar sem segir að það muni ekki, að svo stöddu, fara fram á að opinbera rannsókn á málinu, enda séu flest þau mál fyrnd, sem félagið hafi fengið vitneskju um. Félagið leggur hins vegar áherslu á að greina vandann og hefur þegar hafið undirbúning að því að vinna faglega rannsókn á umfangi hans. Ríkisstjórnin hefur veitt einni milljón króna til þeirrar rannsóknar.