Brotist inn í sjö flutningabíla

Brotist var inn í sjö stóra flutningabíla, við Klettagarða, í fyrrinótt, og stolið úr þeim hljómtækjum og öðrum verðmætum.  Í öllum tilfellum var brotin hliðarrúða í bílunum. Kannski hafa þjófarnir ekki verið mjög vanir, því í einhverjum tilfellum höfðu þeir skriðið inn um brotna rúðuna, í stað þess að teygja sig inn og taka hurðina úr lás. Blóðblettir gefa til kynna að þeir hafi skorið sig við þær aðfarir. Fyrir utan fyrrnefnt tjón lentu sumir ökumannanna í vanda þar sem þeir áttu að leggja af stað út á land eldsnemma um morguninn, en gátu auðvitað ekki farið án hliðarrúðu. Ökumennirnir steðjuðu því niður í Heklu, og tókst þar að leysa vanda þeirra.