Hefði getað farið illa

Fjórir voru fluttir á Slysadeild Landsspítalans eftir að hafa hnigið í öngvit af súrefnisskorti á tónleikum Metallicu í Egilshöll í gærkvöldi og björgunarsveitarmenn þurftu að bjarga tugum manna út úr húsinu, sem komnir voru í andnauð. Eftir að hljómsveitin Mínus hafði hitað upp varð hátt í klukkustundar hlé þar til Metallica byrjaði að spila og var mistri dælt inn í húsrýmið á meðan til að skapa ákveðna stemningu í húsinu, og að sögn fólks, sem var á staðnum, virtist hafa verið drepið á allri loftræstingu til að viðhalda mistrinu. Þegar þarna var komið sögu var svitinn farinn að boga af öllum viðstöddum og fólk fór að eiga erfitt með andardrátt. Greip lögreglan þá til þess ráðs að láta opna allar útgöngudyr á húsinu og setja loftræstinguna á fullt og varð ástandið skaplegt upp úr því. Að sögn Geirs Jóns Þórissonar hefði getað farið illa ef skelfing hefði gripið um sig meðal gesta og eins ef ölvun hefði verið þar almenn, sem ekki var. Að sögn Geirs Jóns virðist höllin henta vel fyrir stórviðburði, en vegna ástandsins í gær verður nú farið yfir málin með húseiganda og tónleikahaldaranum. Þar fyrir utan var góður rómur gjör að leik og söng bandarísku sveitarinnar. Um það bil átján þúsund manns, eða um sex prósent þjóðarinnar, sóttu tónleikana, sem stóðu fram yfir miðnætti.