Andstaðan með eigið frumvarp

Stjórnarandstaðan ætlar að leggja fram frumvarp um þjóðaratkvæðagreiðsluna um fjölmiðlalögin. Samkvæmt því á einfaldur meirihluti að duga til þess að hafna lögunum. Formaður Samfylkingarinnar segir að ríkisstjórnin sé hrædd við vilja fólksins í landinu. Frumvarp Samfylkingarinnar, Vinstri grænna og Frjálslynda flokksins um þjóðaratkvæðagreiðsluna hefur verið í vinnslu að undanförnu og hafa forystumenn flokkanna leitað fanga víða. Formenn flokkanna ætla að hittast á sérstökum samráðsfundi klukkan níu í fyrramálið og verður stefnt að því að kynna frumvarpið áður en þing kemur saman að nýju á mánudag. Steingrímur J. Sigfússon, formaður Vinstri grænna, segir að stjórnarandstaðan sé við öllu búin, þar sem ríkisstjórnarflokkarnir hafi dregið málið, og hann gagnrýnir Framsóknarflokkinn fyrir að ætla að hoppa út í enn eitt kviksyndið með íhaldinu. Össur Skarphéðinsson, formaður Samfylkingarinnar, segir að því miður hafi ríkisstjórnin ekki viljað taka í útrétta sáttahönd stjórnarandstöðunnar. Hann segir stjórnarandstöðuna ætla að standa saman að frumvarpi þar sem framkvæmd þjóðaratkvæðagreiðslunnar sé útfærð. Þar sé lögð áhersla á að engar girðingar eða þröskuldar séu settir. Að það verði einfaldur meirihluti þeirra sem taki þátt sem ráði. Andstaðan sé raunar á því að stjórnarskráin leyfi ekk annað. Össur segir að æskilegast hefði verið að ríkisstjórn og stjórnarandstaðan næðu saman um málið, ekki síst í ljósi þess vafa sem felst í því að setja girðingar á atkvæðagreiðsluna. Hann segir ekki hægt að setja lög sem með einhverjum hætti takmarki rétt manna til að ráða niðurstöðum. Hugmyndir sem hafi komið frá ýmsum ráðherrum um það séu fráleitar. Össur er helst á því að ráðamenn séu hræddir við vilja fólksins.