Jarðböð á Mývatni

Margra ára draumur Mývetninga um baðlón í sveitinni varð að veruleika í dag þegar jarðböð Baðfélags Mývetninga voru formlega tekin í notkun. Starfsemin hefur verið í undirbúningi í um áratug og nemur kostnaðurinn um hundrað milljónum króna. Mikil uppbygging hefur verið að undanförnu að Jarðbaðshólum í Bjarnarflagi, sem er í fjögurra kílómetra fjarlægð frá Mývatni. Um 80 hluthafar koma að uppbyggingunni, en burðarásar í verkefninu eru Byggðastofnun, Iðnaðaráðuneytið, Landsvirkjun og KEA. Gert hefur verið um fimm þúsund fermetra baðlón, og byggt hefur verið sérstakt móttökuhús, gufuböð og heitir pottar. Heildarkostnaður nemur um hundrað milljónum króna. Pétur Snæbjörnsson, stjórnarformaður Baðfélags Mývetninga, segir þetta stóra stund fyrir sveitina. Tilkoma baðsins muni styrkja atvinnuveg á svæðinu. Tíu til fimmtán manns munu vinna í böðunum í sumar en síðan sé ekki vitað hver margfeldisáhrifin verði. Það er þegar fleiri gestir komi til Mývatns skapist fleiri störf.