Vöruskiptahalli vindur upp á sig

Vöruskiptahallinn heldur áfram að vinda upp á sig og var tveimur milljörðum króna meiri í síðasta mánuði, en á sama tíma í fyrra. Það er talsverður munur í prósentum talið því hallinn núna er 18,7 milljaðrar á móti 14,9 milljörðum í fyrra. Hallinn hefur verið að aukast upp á síðkastið því fyrstu fimm mánuði ársins var vöruskiptajöfnuðurinn óhagstæður um sjö milljarða, þar af um tvo milljarða í síðasta mánuði, sem er langt yfir meðallagi frá áramótum. Fyrstu fimm mánuði síðasta árs var jöfnuðurinn hins vegar hagstæður um 2,4 milljarða þannig að viðsnúningurinn nemur 9,4 milljörðum til hins verra á milli ára, samkvæmt tölum Hagstofunnar. Þetta gerist þrátt fyrir að verðmæti vöruútflutnings hafi aukist um þrjá og hálfan milljarð fyrstu fimm mánuðina, eða um 4,4 prósent frá í fyrra, en það nægir hvergi nærri til að vega upp aukinn innflutning. Hann jókst um tæpa 13 milljarða, eða tæp 17 prósent. Þessi aukning er þrátt fyrir mun minni innflutning á flugvélum og skipum en í fyrra, en þau kaup hleypa innflutningstölum að jafnaði verulega upp.