Sýknaður vegna tafa á málsmeðferð

Keflvíkingur var í dag sýknaður af ákæru um tryggingasvik vegna þess að ámælisverður dráttur hafði orðið á málsmeðferðinni. Vitni voru dáin og málsskjöl svo máð af elli að ekki var hægt að lesa þau. Enginn sakborningur á að þurfa þola að meðferð máls hans dragist úr hömlu. Í slíkum tilvikum eru þeir sýknaðir, þótt þeir séu í raun sekir um þau brot sem þeir eru sakaðir um. Keflvíkingur, sem var ákærður fyrir að hafa ítrekað og með skipulegum hætti svikið fé úr tryggingafélögunum á árabilinu 1989 til 1991, var í dag sýknaður í Héraðsdómi Reykjavíkur af þeirri ástæðu. Gildir einu þótt dómarinn komist að þeirri niðurstöðu að sök sé sönnuð í fimm tilvikum af níu. Málið hafði legið óhreyft hjá lögreglunni í 7 ár þótt það hafi verið álitið nógu alvarlegt í byrjun til þess að hneppa manninn í gæsluvarðhald. Málið var ekki þingfest fyrr en árið 1999 og velktist svo í dómskerfinu þangað til í dag. Ekki var skipulega tekið á því fyrr en í desember í fyrra og því lauk svo með hreinni sýknu sem fyrr segir. Í dómnum segir orðrétt: „Allur málatilbúnaður ákæruvaldsins er mjög ruglingslegur og mjög erfitt og oft útilokað að sjá tengsl einstakra skjala við einstaka ákæruliði.“ Dómarinn segir að hluti skjala sé nánast ólæsilegur enda höfðu skjölin máðst á þeim langa tíma sem leið frá því að rannsókn lögreglu hófst og dómur féll. Enn fremur séu vitni í málinu látin. Svo segir að drátturinn, bæði hjá lögreglu og dómstólum, sé andstæður meginreglu laga um meðferð opinberra mála, ákvæðum stjórnarskrárinnar og mannréttindasáttmála Evrópu. Dómarinn segir og undirstrikar að drátturinn sé „ámælisverður“. Jón H. Snorrason, yfirmaður efnahagsbrotadeildar Ríkislögreglustjórans, viðurkennir að þetta sé áfellisdómur yfir embættinu en einnig dómstólum. Rannsóknin hafi meðal annars tafist þar sem hluti tryggingasvikanna átti sér stað erlendis og beðið var of lengi eftir niðurstöðum að utan. Margir hafi komið að rannsókninni, sumir horfið til annarra starfa, embætti Rannsóknarlögreglu ríkisins lagt niður og þar fram eftir götunum.