Liháinn má koma aftur

Litháinn sem Hæstiréttur dæmdi að hefði ranglega verið vísað úr landi hefur ekki tekið ákvörðun um það hvort hann snýr aftur hingað til lands. Honum er það þó algerlega frjálst. Forstjóri Útlendingastofnunar er staðfastlega þeirrar skoðunar að rétt ákvörðun hafi verið tekin þegar manninum var vísað úr landi. Maðurinn sem um ræðir nauðgaði og myrti 27 ára gamla, þriggja barna móður í heimabæ sínum í Litháen árið 1995. Litháenskur dómstóll dæmdi manninn ósakhæfan, en hann greindist með ofsóknarkenndan geðklofa. Hann var vistaður á sjúkrahúsi í fjögur ár, hélt til Íslands eftir að hann var útskrifaður þaðan og fékk dvalarleyfi til ársins 2001. Útlendingaeftirlitið úrskurðaði að manninum skyldi vísað úr landi þegar þegar því bárust upplýsingar um bakgrunn hans. Dómsmálaráðuneytið staðfesti þann úrskurð. Hann byggðist á læknisfræðilegum gögnum frá árinu 1995. Þar segir að hann þurfi stöðugt eftirlit og lyfjagjöf. Útlendingaeftirlitð taldi ekki vogandi að bíða eftir úrskurði heilbrigðisyfivalda hér á landi um andlegt ástand mannins. Hæstiréttur taldi að slíkir annmarkar hefðu verið á meðferð málsins að ógilda skyldi brottvísunina. Georg Lárusson, forstjóri Útlendingastofnunar, segir dóminn vera skýra ábendingu um að stofnunin þurfi að breyta sínum vinnubrögðum. Komi upp viðlíka mál sé ljóst að fram þurfi að fara ítarlegri og nákvæmari rannsókn en fram fór í máli Litháans. Georg segir Hæstarétt eiga lokaorðið en samt segist hann vera þeirrar skoðunar að hafi ekki verið skynsamlegt, vogandi eða rétt að bregðast við með öðrum hætti en þarna var gert. Georg segir dómsmálaráðuneytið og Héraðsdóm deila þeirri skoðun með sér. Frá því manninum var vísað úr landi hefur hann ekki getað ferðast um Schengen-svæðið og gæti átt skaðabótakröfu á hendur íslenska ríkinu vegna takmörkunar á ferðafrelsi. Hann er staddur í Litháen um þessar mundir og segir lögfræðingur hans að honum líði vel. Hann sé ánægður með að hafa unnið fullnaðarsigur í málinu. Litháinn hefur ekki tekið ákvörðun um það hvort hann höfði mál á hendur íslenska ríkinu, né heldur hvort hann muni flytja hingað til lands á nýjan leik. Óski hann eftir því fær hann það skýrt og klárt. Georg segir manninn ekki einu sinni þurfa að leggja inn umsókn heldur þurfi hann aðeins að óska eftir framlengingu á því leyfi sem hann hafði því aðgerðir Útlendingastofnunar og dómsmálaráðuneytis séu felldar úr gildi.