Deila við Norðmenn í uppsiglingu

Enn ein fiskveiðideilan við Norðmenn er í uppsiglingu. Norsk stjórnvöld hafa tilkynnt að erlend skip megi að hámarki veiða 80.000 tonn af síld á Svalbarðasvæðinu til 15. október. Framkvæmdastjóri LÍÚ segir ekki koma til greina að hlíta þessu. Deilan sem upp er komin snýst um heimildir þjóða til síldveiða á Svalbarðasvæðinu. Norsk stjórnvöld gáfu í síðustu viku út einhliða tilskipun um 80.000 tonna hámarkskvóta á síld til handa erlendum fiskiskipum á Svalbarða fram til 15. október. Poul Oma hjá norsku fiskistofnuninni lét hafa eftir sér í viðtali við norska blaðið Fiskaren að verði tilskipunin höfð að engu muni brotleg skip færð til hafnar í Noregi, eins og hverjir aðrir landhelgisbrjótar, með tilheyrandi sektum og upptöku afla og veiðarfæra. Samkvæmt Svalbarðasáttmálanum svokallaða eiga allar aðildarþjóðir sáttmálans jafnan rétt til veiða á svæðinu og því ekki allir á eitt sáttir um ákvörðum norskra stjórnvalda. Friðrik J. Arngrímsson, framkvæmdastjóri LÍÚ, segir Norðmenn hafa tekið sér rétt við Svalbarða sem byggist ekki á sáttmálanum heldur á norskum lögum um efnahagslögsögu. Hann telur réttast að látið verði reyna á málið fyrir alþjóðlegum dómsstólum því Norðmenn hafi verið að koma í veg fyrir lögmætar veiðar Íslendinga á svæðinu. Friðrik segir mjög mikilvægt að stjórnvöld hérlendis láti reyna á þetta sem fyrst. Friðrik finnst blasa við að Íslendingar verði að fara inn á Svalbarðasvæðið, ef viðmiðunum um 80.000 tonn af síld verði náð, „vegna þess að við getum ekki látið Norðmenn fara svona með okkur,“ segir Friðrik.