Fiskveiðideila í uppsiglingu

Enn ein fiskveiðideilan við Norðmenn kann að bresta á í sumar og eru gagnkvæmar hótanir þegar hafðar uppi. Flestir muna líklega eftir Smugudeilunni svonefndu sem blossaði upp fyrir tæpum áratug vegna þorskveiða íslenskra skipa á alþjóðlegu hafsvæði á milli Noregs og Íslands. Deilan núna myndi hins vegar snúast um síldveiðar íslenskra skipa við Svalbarða en þar hafa Norðmenn einhliða gefið út 80 þúsund tonna kvóta til fiskiskipa frá öðrum löndum en Noregi. Íslendingar viðurkenna aftur á móti ekki rétt Norðmanna til að fara með Svalbarðasvæðið sem eigin lögsögu, enda gildi fjölþjóðlegur samningur um Svalbarða. Friðrik J. Arngrímsson, framkvæmdastjóri LÍÚ, segir í viðtali við norska blaðið Fiskaren að Íslendingar muni hafa þetta að engu og veiða að vild ef þeim sýnist. Poul Oma hjá norsku Fiskistofunni segir í viðtali við sama blað að ef svo fari verði íslensku skipin tekin og færð til hafnar í Noregi eins og hverjir aðrir ótýndir landhelgisbrjótar við Noreg, með viðeigandi háum sektum og upptöku afla og veiðarfæra. Friðrik J. Arngrímsson yrði þá á heimavelli vegna þess að í smugudeilunni stóð hann í ströngu sem lögmaður við að greiða úr þess háttar flækjum eftir að norska strandgæslan hafði tekið íslensk fiskiskip að veiðum í Smugunni og fært til hafnar í Noregi.