Rafn Jónsson látinn

Rafn Jónsson tónlistarmaður lést á heimili sínu í Hafnarfirði í gær eftir langa baráttu við MND- taugasjúkdóminn. Rafn var fæddur á Ísafirði árið 1954 og hefði því orðið fimmtugur síðar á þessu ári. Hann barðist hetjulega við sjúkdóminn af einstöku æðruleysi og lét aldrei bugast þótt á móti blési. Rafn stofnaði MND-félagið árið 1993 í samvinnu við aðra MND-sjúklinga og var áður í forystusveit íslenskra popptónlistarmanna í hljómsveitum á borð við Grafík, Bítlavinafélagið og Sálina hans Jóns míns. MND sjúkdómurinn er afar grimmur sjúkdómur. Hann er banvænn og ágerist yfirleitt hratt. Hann herjar á hreyfitaugar líkamans sem flytja boð til vöðvanna og leiðir til máttleysis í vöðvum og síðan lömunar. Aðeins einn af hverjum tíu lifa í 10 ár eftir að sjúkdómurinn gerir vart við sig. Rafn greindist með MND um áramótin 1987/88 og barðist því við sjúkdóminn í yfir 16 ár. Rafn hætti aldrei tónlistarsköpun sinni. Síðustu mánuði vann hann að sólóplötu, ásamt sonum sínum Ragnari og Agli, og höfðu þeir nýlokið upptökum í Abbey Road hljóðverinu og hljóðblöndun með upptökustjóranum Ken Thomas. Að sögn eftirlifandi eiginkonu hans, Friðgerðar Guðmundsdóttur, var Rafn mjög sáttur við útkomuna og er stefnt að því að platan komi út í haust. Guðjón Sigurðsson, félagi í MND félaginu, stendur fyrir söluherferð til að styrkja Framkvæmdasjóð félagsins. Upplýsingar um hana er að finna á heimasíðu félagsins, mnd.is